Mjeti arrin, fëmija nuk pret dot, dhe pikërisht aty bëhet gabimi që kushton muaj bateri. Ja rendi që ia vlen të ndiqet.
1. Kontrolloni përpara se ta ndizni
Pesë minuta, një herë:
- Rrotat rrotullohen lirshëm dhe vidat janë të shtrënguara.
- Rripi i sigurimit mbyllet dhe hapet pa forcë.
- Pedali kthehet vetë kur e lëshoni.
- Telekomanda ka bateri brenda, zakonisht dy AAA që shpesh nuk vijnë në kuti.
- Karikuesi është ai i modelit, jo një i ngjashëm nga një pajisje tjetër.
Nëse diçka nga këto nuk është në rregull, na shkruani përpara se ta përdorni.
2. Karikimi i parë bëhet i plotë
Ky është gabimi i ditës së parë: fëmija luan dy orë, mjeti mbetet, dhe bateria nis jetën e saj gjysmë të shkarkuar.
Karikojeni plotësisht përpara përdorimit të parë, zakonisht 8 deri në 12 orë. Po, edhe nëse duket e mbushur nga kutia. Karikimet e mëpasshme janë më të shkurtra.
Karikimi bëhet gjithmonë nën mbikëqyrje, në vend të thatë, kurrë mbi tapet apo mbulesë.
3. Dhjetë minutat e para
Nisni te niveli më i ulët i shpejtësisë, në një hapësirë të sheshtë dhe pa njerëz përreth.
Mbajeni telekomandën ju. Lëreni fëmijën të shtypë pedalin dhe të mësojë se çfarë bën, ndërsa drejtimin e mbani ju. Kur fëmija ndalon vetë tri herë me radhë pa e kujtuar ju, ia lini timonin.
Për fëmijët nën katër vjeç, telekomanda rri në dorën tuaj edhe javët e para. Kemi shkruar veçmas te telekomanda prindërore.
4. Rregullat që vendosen ditën e parë
Rregullat e vëna në fillim mbahen. Të vëna pas një muaji, negociohen:
- Këpucë të mbyllura, gjithmonë.
- Vetëm brenda oborrit, kurrë në rrugë a parkim.
- Ndalojmë kur thërret prindi, dhe kjo provohet disa herë si lojë.
- Karikohet pas çdo loje, dhe këtë mund ta bëjë fëmija bashkë me ju.
5. Java e parë
Prisni që bateria të mos japë maksimumin menjëherë: dy ose tri cikle të plota deri sa të stabilizohet. Pas kësaj, koha reale e lojës është mbi 2 orë për 6V dhe mbi 4 për 12V.
Rikontrolloni vidat e rrotave pas javës së parë. Përdorimi i parë intensiv i liron më shumë se çdo javë tjetër.
Nëse diçka nuk shkon
Mjeti ka garanci sipas modelit, dhe kushtet janë te faqja e garancisë. Për problemet e vogla që zgjidhen në shtëpi, shikoni problemet më të shpeshta.